 |
Der Wessels goot, der Brutschin goot.
D Frau Herzog wägslet in Ständeroot.
Der Räscht wird beriemt, wie ych das gsee,
als Fasnachts Beäärdigungs Comité.
|
 |
Wenn d Frau Amhäärd amme delifoniert,
denn bruucht si iir iPhone ganz ungeniert.
Verschlüsselig isch der Viola suschpäggt,
fiir daas länggt bi iire beraits der Dialäggt.
|
 |
Wenn der Trump mecht Grönland kaufe,
denn leend en deert im Schnee ummelaufe.
I dängg mer d Chance steen do guet,
dass en glyy en Yysbäär frässe duet.
|
 |
Der Röschti goot, äär haig schyyns gnue.
Als heeflige Mensch saag i Aadie derzue.
Drnoo will i dää Maa ganz schnäll vergässe
und ändlig mit Gnuss wiider Röschti ässe
|
 |
Harry und Megan, sin bald nimm drbyy.
Si wänn schaffe, kai nutzloosi Royals syy:
Myy Vorschlag, s däät Ängland billiger koo,
die blyybe, der Räscht vo der Sippe kaa goo
|
 |
Sotts dr ‚Mäss Basel‘ wyter schlächt laufe,
kennt d Mäss au am Zolli e Halle verkaufe.
Als Voogelhuus miech die Halle Sinn:
E Plaitegaier hoggt scho dinn.
|
 |
Bim WEF wird der Luftruum iiberwacht.
So schützt me Davos bi Daag und Nacht.
Numme het bim Draie vo iire Runde,
d Patrouille Suisse DAVOS nit gfunde.
|
|
Der Basler Neujoors Apéro isch passé.
D Regierig spändiert kaini Cupli mee!
Zwangsläufig schliesst sich d Froog doo aa:
Fir was bruuche mer noo d Frau Aggermaa?
|
 |
Di zwai heggschte Hyyser in unserem Land
steen bald doo z Basel, s isch allerhand.
Und der dyyrschti Bau vo dääre n Äärde
wird s Basler Biozentrum wäärde.
|
 |
I haa flüssige Dünger fir d Roose boschtet,
dää het im Laade zää Frangge koschtet.
Drbyy gits dää gratis nundefaane,
in Lieschtel us jedem Wasserhaane.
|
 |
I lueg amme die Zyt wie Feerie aa.
S git niemerts, wo aim steere kaa.
I due lääse und gang frie in d Pfanne;
Aifach e Sääge, die Swisscom Panne.
|
 |
Ins Musical-Theater, s wäär z iberleege,
kennt me guet der ‚Grossi Root‘ verleege.
Dää spuggt doch grossi Deen passabel
und spiilt scho syyt Joore ‚Les Miserable‘.
|
 |
Bi syym Interview z Amerika
het der Muurer Ueli e Stäärnstund ghaa.
Der Ueli het, das het me gheert,
bi der Frau Martullo Änglisch gleert.
|
 |
D Greta macht GRIEN zem Sujet-Hit
und BLAU bisch an der Fasnacht nit.
Drumm seen mir Bebby wirgglig ROT
wenn e Gugge BRUN an d Fasnacht goot.
Schaffe d Mensche d Glyymawändi
und, wenn nit, ischs unser Ändi?
D Anwort druff, kurz und brutaal:
Das isch am Klima schyssegaal. |
