 |
D Frau Leuthard het verlutte lo,
sii well vermuetlig daas Joor goo.
Do hätt i an d Doris e ganz glaini Bitt:
Gäll, nimmsch dr Schneider-Ammann mit. |
 |
Der Zaiger schloot us bi dr Ärdbeebewarte,
wenn d FCB-Fääns mit Gumpe starte.
Wenn me s daas no e weeneli staigere kaa,
verwacht im Roothuus d Frau Aggermaa. |
 |
Naduur Kataschtroofe griege amme
e neie Männer- oder Frauenamme.
Numme im Baaselbiet, s isch zem gryyne,
haisst d Kataschtroofe syt Joore Sabyyne.
|
 |
D
Queen het der Prinz Philip bangsioniert
und vo all syyne Pflichte suschpendiert.
S blybt allerdings ai Pfäärdefuess,
dass äär wyter nääbere schloofe muess.
|
 |
Stimme d Schwyzer zue ‘No-Billag’ joo,
isch d Konsequenz vermuetlig esoo:
Griegsch allewyyl, schaltsch dr Fäärnsee yy,
numme Tele-Blocher, Stroof muess syy.
|
 |
S git jetz fir d Lyt, wo z Basel woone,
koschteloos Velo-Bumpstatione.
Die bedryybe mer, i dängg das goot,
mit haisser Luft vom Grosse Root
|
 |
Duet s Volgg esoo wie z Eeschryych wääle,
kaasch numme Sunnecrème empfääle
Das schyynt i dämm Fall opportun:
Sunnecrème macht schnäller bruun.
|
 |
Am WEF z Davos stellt sich daas Joor
als Bundesbresidänt dr Berset vor.
Äär het, doo isch äär sicher froo,
kai Schmutz vom Juncker iiberkoo.
|
 |
D Olymper dien s Comité nimm verdraage
und sogaar en aigeni Blaggedde draage.
Mache die, wenns doo kai Friide git,
s näggscht Joor bim Säggsilytte mit.
|
 |
Velofaarer, duet me z Basel verfiege,
deerfe jetz bi Root no rächts abbiege.
E Biker maint, d Schmiir kääm nit druus,
äär faar syt Joore bi Root graaduus.
|
 |
Sii kenne sicher syy, i wird hit Zoobe
kai ainzige FCB Spiiler loobe.
Schuttet aine guet, denn gniess is still,
will dää Käärli sunscht ins Ussland will.
|
 |
I haa friener gsait, fallt miir hit yy,
so bleed wie dr Busch kenn niemerts syy
und hitte mergg i konschterniert,
doo haan i mi am Änd TRUMPIERT.
|
 |
D Frau Martullo will in Bundesroot,
aber numme, wenn s nit andersch goot.
Si kaas jo brobiere, miir wird doo nit bang;
Lyt uss dääre Familie blyybe nit lang.
|
 |
Uff Saint-Louis gits jetz au e Drämmli.
Deert aane faart nei der Dreier nämmli.
Als Faasnächtler mecht i am Wessels no saage,
s isch mit Abstand der dyyrschti Waggiswaage.
Epilog
S git Lyt doo z Basel, die däätes begriesse,
wenn me dr Wessels uff e Mond kennt schiesse.
Nai mached das joo nit, nundefaane,
sunscht baut dää no e Drämmli deert aane.
|
