|
Wo
n i am Moorge blutt vor em Spiegel stand,
doo grinst myy Frau, s isch allerhand,
und sait drnoo, lueg nit soo bedruggt,
bim COOP giengsch no duure als Frischproduggt. |
|
Der
Blocher het effentlig Stellig bezooge
und zuegää, äär haigi au scho glooge.
Jä, do het äär bi dääre Gläägehait,
vermuetligg s erscht Mool d Woored gsait. |
|
Der
Fingg isch wägg, s isch scho veruggt.
Dää het uns Hamburg aifach gmuggt.
Die versteen zem Gligg nit vyyl dervoo,
der beschti Voogel häns uns gloo.
|
|
Der
Shakiri schutet, es duet aim wee,
ab em Summer bim andere FCB.
Jetzt seen i das, syt däm Mittwuchoobe,
als Basler Entwiggliggshilf fir d Schwoobe.
|
|
Sait
me saali, dien d Eskimo d Naase ryybe.
Mir Schwyzer gän d Hand, d Japaner leens blyybe.
Und bi uns z Basel, sisch scho glunge,
zaigt der Hanspi Wessels amme d Zunge.
|
|
Z
Italie verschwindet, me glaubts fascht nooni,
duur d Hinterdiire der Berluscooni.
Äär macht numme noo, was äär wirgglig kaa:
Bunga-Bunga, Hoppsassa.
|
|
Schawisnki
und Köppel hän sich droffe.
Baidi bloose sich uff, vom EGO bsoffe,
schwätze bständig enander bim Reede dryy.
S isch sofort glaar, s mien Ziircher syy.
|
|
Der
Brunner, am Blocher syy Pausegloon,
macht sich gaischtig barat fiir di näggschti Session.
Am Moorge iebt äär Schlümpf und Linggi verdryybe,
und am Noomidaag leert äär no lääse und schryybe.
|
|
Will
d Schwyz modäärni Kampfdschett griegt
und iiber die beschti Armee verfiegt,
verhinderet si dappfer und ganz elai
e n Invasion uss Liechtestai.
|
|
Mit ere Stuubefrau isch der Strauss-Kahn ins
Bett.
S isch bassiert, will äär allewyyl Kopfwee het.
I syym Schmäärz het halt amme dää aarmi Maa
Aschpyryyn mit Viaagra verwäggslet ghaa. |
 |
I gang am Sunntig jetzt amme go wandere,
vo Schönebuech bis Kandere.
Nai sii, i bii kai sportligg Wääse,
i will numme die Sunntigs BAZ nit
lääse. |
|
E Stummfilm
het schyyns finf Oscar bikoo.
I kaa die Entschaidig guet verstoo.
Jä sii, mii kennt me beraits iiberzyyge,
kennt mi Frau nuur zää Minute schwyyge. |
 |
Der
Burkhalter verdritt jetzt d Schwyz nach usse.
Zerscht bsuecht äär d Amis, d Chinese, d Russe.
Denn beraist äär no Ditschland, Poole, d Ukraine.
Glyych woo n äär au isch, es merggts halt e kaine. |
|
D Baasler
Regierig laadet zem Apero yy,
d Regierig z Lieschtel schiggt niemerts vrbyi.
I lueg das Fääle durchuss als Voordail aa:
Me muess kai Angscht ums Daafelsilber haa. |
|
D
Frau Bruuni het e Buschi bikoo.
Der Sarkozy isch stolz und froo
und d Franzoose rächne iim bsunders aa,
dass äär au eppis ooni d Frau Merggel kaa. |
