 | Mit
Karikaduure moole heschs hite schwäär.
Drum isch, iir send s, dää Helge läär.
Mit gschmaggloose Bilder machsch d Lyt numme suurer,
drum fäält uf däm Helge der Ueli Muurer. |
| Heerjee,
dää isch jo scho wieder läär.
Esoo viel Bäch, das druggt aim schwäär.
Gmeint isch nit dää Helge, das wäär doch nit nei.
I main d Waalzeedel vo der Saskia Frei. |
| Es
flimmeeret wyss, me griegt e Wuet,
wenn s Fäärnsee e Bildsteerig zaige duet.
Numme miir wird s denn erscht richtig woolig.
Nach ‚Black and Blond’ isch das Erhoolig. |
| Dää
wäär doch uff däm Helge doo
Heerjee äär isch abhande koo.
S hätt mi allerdings au Wunder gnoo
Wenn der ZUBI am rächte n Oort würd stoo. |
| In
Davos maint der Vasella ganz unverhoole
Mi Job mach i guet, i verdien so viel Koole.
Jä, denn miest i, wenn i soo däät liege
der Schwyzer Kulturprys fir d Helge griege. |
| Us
Gsundheitsgrind sind rund um d Stadt
D Hienerheef läär, fascht wie das Blatt.
Als Nääbeneffäggt dasch s sonderbaari
Fäält wit und breit d Frau Zanolari. |
| Also
aigentlig schwäzt äär iberall dryy.
Äär isch keerperlig gross und dringgt gärn Wyy
I zaig doo kai Helge, i frog mi vyylmee:
Mecht epper vo eich der Couchepin see. |
| Das
Bild doo zeige, fallt mir schwäär.
So seets am Schlipf us, wiescht und läär.
S kunnt mir der Gedangge hindefiire:
Sisch wie bim Busch in syner Biire. |
| E
Seel so wyss, wie da Helge doo,
muesch haa, wenn als Paapscht zur Waal willsch koo.
Bruucht s so viel Unschuld, denn frogsch di, wieso
hän die der Doggter Zäch nit gnoo |
| Die
Frau wo dä neyi Laade länggt
Het is ihr Bild in Lääbensgressi gschänggt.
Me seet nit, i gestand das unumwunde
D Frau Oeri säächsch doo wyter unde. |
| Dää
Helge eich zeige, das brucht e bitz Muet.
I mach s, au wenn das das schoggiere duet.
Aer zeigt ooni Schoonig im volle Glanz.
Am Bundesroot Blocher si Laischtigs-Bilanz. |
| Im letschte Momänt haan i doch no draa dänggt.
Fir e Helge het s zwoor nimme glänggt.
Jä, die bruuche das doch, sin ganz druff versässe,
fascht hät i der Väärs iber d Ziircher vergässe. |
