 | Fiir
mi isch s wie e Therapie,
lauft der Fäärnsee, schloof i seelig ii.
I due mi ärnschthaft mit der Froog befasse,
schigg i d BILLAG Rächnig der Granggekasse. |
 | Frogsch
der Muurer Ueli, wie s e em goot,
als nagelnaie Bundesroot,
drnoo sait der Ueli woolerzooge:
Sii, doo miest i zerscht der Blocher frooge. |
 | Hätt
der Busch die Schue an Grind bikoo,
hätt äär kai grosse Schaade gnoo.
S Gsicht miesst me ainewääg ersetze
und e Hirni kasch doo nit verletze. |
 | S
dien jetz alli uff dää Grüübel wette.
Noo der CS soll äär au d UBS rette.
I haa der Iidrugg, mit däm Maa
ersetzt me d Pescht duur d Cholera. |
 |
Mir sin wirgglig froo, het d USA
wiider e Bresidänt wo läse und schriiebe kaa.
Im e sottige Amt, do goot s nit ooni.
Wäär sait das ändlig am Berlusconi. |
 | Sii,
wenn i doo dryyber kennt verfiege,
däät der Tooni Brunner au ain griege.
Äär bikäm e n Oskar soo n e dolle
fyr di wältwyyt dimschti Nääberolle. |
 | Mer
dien der Derdiok jo guet verstoo,
dass er mecht zue Leverkuuse goo.
S Wätter isch deert zwoor weniger haiter,
aber d Ersatzbangg wääsentlig braiter. |
 | Me
kaa niene mee sicher syy, herjee.
Drumm gän sie acht uff s Porpmene.
Heebe si s fescht ooder schliesse si s ii.
S kennt naime e Bängger umme syy. |
 | Noo
de schwarze Schoof sin d Raabe draa.
Fiir miii kunnt folgendi Botschaft aa.
Wäär die Partei noo wääle kaa,
muess wirgglig e grosse Voogel haa. |
 | Wäär
40 Millioone als Loon kassiert
und denn iiber Ethik referiert,
dää basst im Vatikan zwoor guet drzue,
numme schaamlososi Hyychler häns deert gnue. |
 | Noo
Ziiri nd zrugg, duet SBB kund,
git s e Intercity all halbi Stund.
Im Stille haan i mir doo dänggt:
Me hät kenne spaare zrugg hätt glänggt. |
 | Sii,
syt e baar Wuche schwärmt jetz myyni,
vo däm Barak Obama, wie e Teeny.
I kennt iire daas tolerant verzeie,
wenn si im Bett nit YES WE CAN däät schreie. |
