 |
Mi Noochber het z Wyyl e Woonwand boschtet
Zem Sonderbryys, s het weenig koschtet
und drotzdäm macht er e suuri Myyne
äär griegt das Dail nit in Achter yyne.
|
 |
I due jetzt syt de Bundesrootswaale
myni Bundes-Styyre nimme zaale.
Sisch nit beese Wille, au kai Fruscht,
äxgyysi, Herr Muurer, i haa kai Luscht. |
 |
I find der Poli als Schwyzer vom Joor
isch e loogischi Waal, so kunnts mer vor.
Äär isch e Vorbild, das muess me gsee.
Dangg iim kifft jetzt sogar d Armee. |
 |
I haa bis geschter e scheene Koffer bsässe.
Numme haan en laider am Baanhof vergässe.
I bi zrugg, jä sii, s het nimme glängt.
Zwei Zircher Schugger hään en gschprängt.
|
 |
D Frau Martullo, die bewyyst in Bäärn,
Bschaidehait liggt iire fäärn.
Vyyl Gschwaafel und e grossi Glappe,
me kaa nur saage, ganz der Bappe. |
 |
Arsenal duet der Elneny boschte.
Si schyyche weder Mie no Koschte
und si schaffe fiir dää jungi Maa
sogar e ghaizti Ersatzbangg aa.
|
 |
Friener het der Drammdiräggter gsait,
wäär jung isch, stoot us Heefligkait.
Hit leen di Alte, s isch no glunge,
di haarte Holzbängg gäärn de Junge.
|
 |
E Monsignore geschtoot ganz cool,
äär haig e Frind und syygi schwul.
Jä so het sich dää z Room d Karriere vergyggt,
wäär Pfaff will blyybe, gniesst und schwyggt. |
 |
Im Albisguetli duet der Blocher brichte,
die z Bäärn wänn e Diktatur errichte;
äär kämpf do dergääge Daag und Nacht.
So het sich der Bogg zem Gäärtner gmacht.
|
 |
Au doo an der Fasnacht, i find das zvyyl,
kämpft mi Frau verbisse fiir d Glyymazyyl.
Luft hin oder häär, si kaa duuredraie,
an der Fasnacht iss i e Ziebelewaie.
|
 |
Dääre WHO duen i s nit vergässe,
wäge dääre darf i kai Wuurscht me ässe.
Und wäg der SVP, es isch e Fruscht,
vergoot mer jetzt au uff Röschti d Luscht.
|
 |
Myy Nöwöö, der Franz, äär isch kai Strääber
und no dimmer als der Eric Wääber.
Drotzdäm het dää schyyns mit 5,8
bim Mörgeli der Doggter gmacht. |
 |
Der Morin dritt zrugg, äär haig jetzt gnue.
Äär well Grientee dringge, in aller Rue
e bitz Orgele spiile, d Fitness bhalte.
Zämmegfasst: S blybbt alles bim alte.
|
Do no e baar Värs, wo mer
zuesätzligg fiir
der Uffdritt im Ängel in
Lieschtel gmacht hän
|
 |
Laider drifte Basel Stadt und Land
politisch immer mee usenand.
Aber alti Liebi duet nit roschte,
mer dräffe uns noo in Wyyl bim boschte. |
 |
D
Pegoraro schafft im Strossebau
mit ELBA e wytere Supergau.
Noo dääre Blamaage wäär guete Stiil:
E n Abgang uff ELBA und zwoor ins Exil.
|
 |
Spaare
isch Mode, s liggt in der Natur,
zerscht spaart me bi Bildig und Kultuur.
Baides verdrait am Volgg nur der Grind.
Was fir e Zuefall, das ryymt sich uff Gschwind.
|
 |
Im
Baaselbiet do liige d Finanze
syt joore groonisch uff em Ranze
I dängg, dass es doo erscht besser lauft,
wenn d Regierig im Stettli Marroni verkauft. |
 |
Lieschtel
wird Gnuss-Stadt vo däm Joor
I stell s Fescht-Menu fiir dää Aaloss vor:
Zem Apero gits e suure Zwaier
und drnoo grillierte Plaitegaier.
|
