 |
S isch unglaublig, aber s isch esoo,
d Frau Pegoraro will tatsächlig goo.
Vooruusgsetzt, dass d Chirruge kenne,
bi iire der Sässel vom Hinter drenne.
|
 |
S isch glaar, dass daas uff kai Fall goot:
E Buschi schlooft im Groose Root.
Drbyy kaa me deert, si wäärde lache,
aigentligg nyt Gscheyters mache.
|
 |
Me gseet dr Trump und syy Trumpibäär,
die glyyche sich vom Hoorschnitt häär
und si wäärde, wie me verroote kaa,
au glyychvyyl Strau in der Biire haa.
|
 |
Wotsch doodesmuetig s Ryysikoo sueche,
kaasch dyyri Adventure Feerie bueche.
Es goot au billiger, maint myy Schatz.
Laufsch aifach iibere Baanhoofblatz.
|
 |
In New York isch me zimmlig gschoggt,
dass der Berset duss uff e Müürli hoggt.
S kennt jo au e versteggti Bootschaft syy:
E Muure goot mir am Arsch verbyy.
|
 |
Waisch eppis nit, kasch SIRI frooge.
Glaube siis nit, s isch nämmlig glooge.
Will die Äpp miir nit emool hälfe kaa,
wenn i der Yykaufszeedel vergässe haa.
|
 |
Dä Schugger-TESLA isch tächnisch e Hit.
Dr Board Computer dänggt sälbständig mit.
Styyrt e Schugger wirds noonemool glaarer,
das Auti isch gescheyter als der Faarer.
|
 |
Uff em Laufstääg, s irritiert e glai,
mache d Models immer e suure Stai.
Finanziell hän die kai Grund zem glaage,
numme grins emool mit läärem Maage.
|
 |
Duet d BVB bi der Waartig spaare,
bis d Trämmli nääbe de Schiine faare,
basst doch der Wessels perfäggt derzue.
Äär stoot au maischtens nääbe de Schue.
|
 |
S het ain welle mit em Auti hai,
vo Birsfälde richtig Münchestai.
Äär faart in Dunnel deert bim Schänzli unde.
Jo und sythäär het en kain mee gfunde.
|
|
BILLAG Gebühre sin jetzt passé.
Die Rächnig verschiggt jetzt d SERAFE.
Ains kaan i allerdings nit ganz verstoo:
myy Goldfisch het au son e Rächnig bikoo.
|
 |
Wenn yych kaini Väärs me mache kaa
stelle miir der Schneider Ammann aa
Dä hätt jetzt Zyt, hejoo das wäärs,
bi däm lache d Lyt au ooni Väärs.
|
 |
Der FCB, nai, es isch kai Witz,
het z Indie jetzt syy zwaite Sitz.
Die sueche halt uff der ganze Äärde
e Land, wo si Maischter kennte wäärde. |
 |
Syt d SVP jetzt au Huusbsiech macht
verfolggt mi en Albdraum jeedi Nacht.
I draim, dass bletzligg Zoobe spooet
an der Diir d Martullo Blocher stoot. |
